【港男以女優條件揀女不切實際，女朋友內心大控訴】
上次就講左男人內心說話啦，今次輪到女朋友反撃！女人就是原罪？你估男人真係冇錯架？一日到黑只係識鬧女人，個個講到自己幾好幾好，又訂幾高要求，明明現實中少少時間都唔想分比女朋友。成日望住明星塑造出黎既形象彈我地，真係以為自己係加藤英？想女朋友好似AV裡面咁你話乜就乜？
1. 話就話自己好攰好攰，唔想出街，但係玩既時間表就排到密密麻麻。講到淨係自己返工攰咁，女朋友唔攰？每人都有自己野要做架啦，點解我攰完搵佢可以照樣咁開心，而男朋友就淨係識晚晚話自己攰，要休息？
明明佢其他時間可以約人去呢度嗰度，搞到兩個人一個月都唔知有冇見一次，節日、紀念日、有困難嗰陣完全冇影。加埋佢唔中意wtsapp根本係零接觸，拍拖拍到好似單身咁不如唔好拍！
(我發現呢點男女爭拗得好勁，其實真心咁極端，完全冇分時間陪女朋友既話，咁男朋友就要改啦，唔好一味話女朋友好煩)
2. 男朋友平時粒聲唔出，問佢咩事話無野，又唔知自己塊面show出黎黑到死。有時都唔知佢係嬲定係點，咩都唔講又想人明白佢地。有時溝通下，主動比人知發生咩事好難咩？佢估女朋友真係識讀心術咩屌:o) 開口講下野係咪真係咁難？
3. 一時又話要私人空間，唔想成日見面；好喇到我搵朋友食野、傾偈又問我係邊個。咁我都要同人交流下先唔會變毒J架嘛，唔想我成日搵佢又唔想我搵其他人，佢玩曬？咁如果咩都唔比我做，同之前工人唔比開冷氣有咩分別？
4. 話我煩，話我多野講，話我痴身，但情侶唔溝通仲衰過做朋友。其實都係同佢分享下日常生活八卦事姐，如果唔係邊有咁多野講呀，佢又唔講野，出到街大家一齊唔好出聲好唔好？
5. 成日睇ig女神既相，成日昅女都唔緊要，flirt女堅頂唔到！人地叫你哥哥 ，佢叫人傻豬？講埋曬啲咸濕野同我講係普通朋友？離譜都要有個限度吖，既然佢仲想玩，唔想咁快安定落黎，不如早啲放生我啦好嘛。
嘩一睇先知，原來女仔都好大怨氣，上面既問題相信講中好多女朋友內心話。不過睇埋上次男朋友版就覺得講咁多都無謂，拍拖求唔開心既時間仲多過開心，咁拍黎做咩？如果仲係好愛就乖乖地搵方法合作啦，使鬼又呻又唱咁辛苦咩。所以有問題就直接同另一半講！知冇？
Search